Englar, Eddan og óréttlætið

Ég hef það á öllum tilfinningunum að þeir pennar og aðrir málglaðir sem hafa tekið til máls um þann vanda sem þarf að leysa til að búa innflytjendum allt í haginn, hafi í raun alltaf verið með vængi eða geislabaug, eða hvorutveggja. Það hefur bara alveg farið framhjá mér.

Það er hinsvegar þannig að það er ekki innan verkahrings engla að hugsa fram í tímann, að sjá hlutina fyrir eða átta sig á hvaða fyrirbyggjandi aðgerðir er hægt að framkvæma. Ekki fyrr en að skoðanakannanir sýna að almenningur hefur mikinn áhuga á málinu en þá koma englarnir til hjálpar. En ástæðan fyrir því að margir englar fara í pólitík er sú að enga launaða vinnu er að hafa í nútímasamfélagi fyrir engla, þeir hafa ekki löggilt starfsheiti, engrir taxtar til, of mikil yfirvinna og engin eftirlaun. Þetta hlutverk engla, sem er afar vanmetið í dag, skilar einfaldlega engu í kassann. Þess vegna neyðast margir englar til að gerast atvinnupólitíkusar. Svona er þetta nú óréttlátt.

Ég var líka að rekast á frétt um valnefndarmenn vegna Edduhátíðar og meint áreiti sem þeir hafa orðið fyrir vegna tilnefninga til Edduverðlaunanna. Þetta er hugsanlega árviss viðburður, það er óánægja með þessa hátíð. Það er ekki einfalt að standa að svona vali í litlu samfélagi en samt ætti það að vera gjörlegt, verðlaun hafa verið veitt með ágætum árangri á Íslandi alveg frá því að Hrafnkell Freysgoði hjó hausinn af ungum sveitunga sínum. Líklega liggur vandinn í því að einum of mörgum af stjórnarmeðlimum stjórnar Eddunnar er ekki treyst miðað við fyrri afrek, og það vantraust smitast til valnefndarmanna, og kannski verður Eddunni ekki treystandi fyrr en búið er að endurnýja stjórnina. En mjög líklegt er að atvinnulausir englar hafi reynt að finna sér starfsfarveg í stjórnum einsog stjórn Eddunnar, því það er ýmisslegt sem fer saman við starflýsingu engla og að vera í svona stjórn, t.d. að koma réttlætinu að með öllum ráðum. Þegar leikið atriði (Silvía Nótt) var t.d. sett í sama hóp og óleikin atriði var stjórn Eddunnar sökuð um að stíga ekki í vitið, og var það ómakleg athugasemd. Þannig eru störf engla vanmetin. Svona er þetta óréttlátt.

... annars var ég líka að horfa á seinni hluta "Silfur Egils" í dag á netinu þar sem fram kom Ágúst Einarsson talandi um hinar skapandi atvinnugreinar. Ágætur málflutningur en Ágúst sagði það sama í fyrra og árið þar áður og árið þar áundan, fyrrum pólitískusinn og nú akademiger sem svarar ekki "en hvað svo" og hvaða praktískur lausnir í stjórnkerfinu þarf að finna. Hvers vegna var Egill að fá hann í þáttinn?