Dýrin í Hálsaskóginum

Þau innlegg sem finna má á http://http://www.logs.is/ í framhaldi af fundi Kvikmyndamiðstöðvar Íslands (KMÍ) 1. des. sl., fundi sem hefur einhver vegin tekist að gefa orðinu “samráð” háðslega merkingu, eiga það sameiginlegt að setja púður í málefnið sem ég skil ekki hvað varðar málið yfirleitt. Það er, hvernig myndir eru fjármagnaðar.

Hvers vegna að telja upp hvar framleiðandi geti fjármagnað 60% af mynd sinni, er það ekki mál framleiðandans, og hvernig er hægt að gefa sér það sem þekkta örugga stærð að t.d. RUV setja x mikið framlag í kvikmynd? Eru ekki brýnni mál sem verðskulda athygli. Fékk ekki Opinberun Hannes xxx framlag frá RUV? Hvað hafa aðrar myndir fengið, y, hálft x? Ég skal ekki segja með vissu, en ekki fer mikið fyrir nýjum hugmyndum. Hvar voru séfræðingarnir, eða ráðgjafar KMÍ? Þeir hljóta að vita þetta allt saman. En með þessu virðist umræðunni lokið, nú er búið að halda einn fund og þá getur KMÍ haldið áfram geðþóttvinnu sinni, kvartað undan peningaleysi þegar við á og boðið fólki í piparkökur.

Var það ekki Mikki refur sem sagði að stolnar kökur væru góðar. Eða var það öfugt. Eða var það bakarameistarinn sem sagði þetta við Mikka þegar Mikki kom í búðina hans, eða var það bakaradrengurinn sem sagði þetta við bakarmeistarann þegar þeir sáu að Mikki var á leiðinni, eða sagði bakaradrengurinn við Mikka að kökur keyptar á heiðarlegan hátt væru sko sætar ?

Ég bara man þetta ekki lengur …